Peugeot 308 jubilar

Vetëm katër muaj pas fillimit të shitjes në Evropë, prodhimi i Peugeot 308 ka arritur në 100.000 njësi. Fituesi i Timonit të Artë gjerman këtë vit do të zgjerojë ofertën e tij.

Ky rezultat domethënës është i lidhur edhe me daljen e versionit me tre dyer në treg, dhe motorëve ekonomik si dhe ekologjik si 1.6 l HDi, i cili nuk emeton më shumë se 120 gramë CO2 për kilometër.

Për shkak të kualitetit sipëror të prodhimit dhe përpunimit përfundimtar, Peugeot 308 është pranuar shumë mirë në tregjet më të mëdha evropiane, si në atë gjerman, ku edhe ka fituar çmimin prestigjioz Timoni i Artë.

Në fund të vitit 2007, Peugeot 308 ka filluar të ofrohet edhe në tregjet jashtë Evropës. Ky automjet prodhohet në fabrikat Mulhouse e Sochaux, derisa brenda një dite prodhohen jo më pak se 1.400 automjete.

Që nga pranvera e këtij viti, oferta do të zgjerohet edhe në versionet tjera të modelit, të cilën gjë e presin edhe klientët në këtë segment shumë të kërkuar, posaçërisht atë karavan, prototipin e të cilit e ka shfaqur në panairin e automjeteve, në Frankfurt të Gjermanisë, gjatë muajit shtator të vitit që sapo e lamë pas.