E merr gjumi në hekurudhë, mbijeton kalimin e trenit

Një australian, i cili ka fjetur në hekurudhë, ka shpëtuar vetëm me disa gërvishtje pasi që treni ka kaluar përmbi të, ka njoftuar policia lokale.

I riu 20-vjeçar ka fjetur të enjten në mëngjes në mes të binarëve në qytetin Port Augusta, të Australisë Jugore. Drejtuesi i trenit e ka hetuar djaloshin e fjetur, por nuk ka arritur që me kohë të ndaloj trenin i cili ka kaluar përmbi të.

Policia ka theksuar që njëzetvjeçari, për të cilin mediat kanë thënë që ka qenë në gjendje të dehur, ka marrë vetëm gërvishtje të lehta.

"Me të vërtetë ka qenë me shumë fat pasi që ka fjetur në mes të binarëve dhe treni ka kaluar mbi të dhe nuk e ka shkelur", ka thënë për të përditshmen “Australian” drejtori i kompanisë hekurudhore “Freightlink”, Tony Aldridge.